മറവി

മറന്നു പോയ ഒരു രാത്രി 

ഇന്നലെ സ്വപ്നം കണ്ടു 

മറന്നു പോയത് 

രാത്രി നീല നിറം ചാർത്തി 

നിന്നത് 

അകന്നു പോയ കാലടികൾ 

ഉള്ളിൽ മിടിപ്പുകളായി മാത്രം 

ബാക്കിയായത് 

മിടിപ്പുകൾ മാത്രം 

ഒരു രാത്രിയുടെ ഓർമയായത് 

ഓരോ നിമിഷവും 

മിടിപ്പുകൾക്കൊപ്പം 

ജീവിതം നടന്നു പോയത് 

മറവിയുടെ വഴികളിലേക്ക് 

നടക്കുവാൻ മടിച്ചു തിരിച്ചു നടന്ന 

ഓർമകളെ മാത്രം തൊട്ടു നടന്നത് 

ഞാൻ മറന്നുവോ 

ഞാൻ ഒരു മറവി മാത്രമായത് 

കാറ്റെടുത്തു പോയ ഒരു മഴപ്പാട്ട്

കാറ്റെടുത്തു പോയ ഒരു മഴപ്പാട്ട്  ..
ഉള്ളിൽ ഒളിച്ചു വച്ചത്
നീ മാത്രം ഒരു കണ്‍കോണിൽ
കണ്ടെടുത്ത്
അറിയാതെ പറഞ്ഞ കഥയിൽ
സ്വയം തോന്നിയത്
നടന്ന വഴിയിൽ
വീണ്ടും നടക്കുമ്പോൾ
കൂടെയില്ലെങ്കിലും
വെറുതെ
വിശേഷം പറയും ..
അല്ലെങ്കിലും വല്യ കാര്യങ്ങൾ ഒന്നുമല്ലല്ലോ
പറഞ്ഞു വരുന്നത്

നിന്നെ കാത്തു നിന്നത്
രാത്രി ചന്ദ്രൻ ബാക്കിയാക്കിയ നിലാവ്
വെളുത്ത പൂക്കളായത് ..
പ്രണയ സ്വപ്നങ്ങൾ ചുവന്നു വിരിഞ്ഞത്

ഇപ്പോൾ ഇവിടെ പെയ്ത മഴ
മരുഭൂമിയിൽ വെളുത്ത് പെയ്യുന്നതായി
നീ മഴയുടെ കുളിരിൽ അലിഞ്ഞു നിൽക്കുനതായി
ആ മഴ ഞാനാവുന്നതായി ..

ഒക്കെ വെറുതെ
ഇവിടെ നനഞ്ഞു പെയ്യുന്ന
കണ്ണീരിന്റെ മൂടുപടത്തിനപ്പുറം
മഴ മാത്രം പെയ്യും ..
കാറ്റടിക്കുമ്പോൾ ചെരിഞ്ഞും ആടിയും
സ്വപ്നങ്ങൾക്കൊപ്പം പെയ്തൊഴിയും

പൂവുകൾ വീണ്ടും വിരിയുമ്പോൾ
ആരാണ് ബാക്കിയാവുക ?

രണ്ടാം പാഠം

രണ്ടാം പാഠത്തിൽ 

വിരിയാൻ വച്ച മയിൽ പീലി 

നീ ചോദിച്ചപ്പോൾ 

മടിക്കാതെ തന്നത് 

എന്റെ ഉള്ളിൽ ആ ചോദ്യം 

ഒരു മയിൽ നൃത്തം ചെയ്തു 

കൊഴിഞ്ഞ പീലികൾ 

താഴെ വീണു വിരിഞ്ഞു 

വേദനയുടെ പീലികൾ 

നിന്റെ പുതിയ അതിഥി 

എന്റെ ചുണ്ടിൽ ചോര വീഴ്ത്തി ചിരിച്ചു 

നീയും 

ചോര വീണത്

പരിഹാസ ചിരിയുടെ കിലുക്കത്തിൽ 

കരഞ്ഞു വീർത്ത മുഖം നെഞ്ചിൽ ചേർത്ത് 

ഉള്ളിലേക്ക് നിന്റെ വേദനകളുടെ മുള്ളുകൾ 

ആഴ്ത്തി മുറിക്കാൻ 

നീ വീഴാതെ നടക്കൂ 

മയിൽപീലികൾ വിടരുന്നു 

ഇവിടെ മഴമേഘം നിഴൽ വീഴ്ത്തുന്നു 

ഇടം 

ഈ മണ്ണ് ഈ ഭൂമി 

ഈ മഴയും ഈ പുഴയും 

ഈ വേനലും ഈ വെയിലും 

എന്റേതല്ല 

ചകിരിനാരിൽ കോർത്ത്‌ നീ നൽകിയ കുരിശും എന്റേതല്ല 

ഓർമയുണ്ട് 

മുലപാലിന്റെ മാധുര്യത്തിനൊപ്പം 

ചെന്നിനായകത്തിന്റെ കയ്പ്പ് നൽകിയ അമ്മയെ 

ഇടതു മാറിലെ നിന്റെ കറുത്ത മറുക് എനിക്കുള്ളതല്ല 

ഓർമയുണ്ട്

അനുവാദം ചോദിക്കാതെ പടി കയറിയെത്തിയ 

കടം കേറി ആരോടും അനുവാദം വാങ്ങാതെ 

ഒരു മുഴം കയറുമായി പടിയിറങ്ങിയ അച്ഛനെ 

നിന്റെ മേൽ ചുണ്ടിൽ പൊടിഞ്ഞ വിയർപ്പ് എന്റേതല്ല 

പാതി മറഞ്ഞ ബോധത്തിന് മേൽ ഇരുളിന്റെ നാവു പിഴിഞ്ഞ് നിറച്ച 

ലഹരിയുടെ രാത്രികൾ 

കണികൊന്നയുടെ ഇളം മഞ്ഞ അലിഞ്ഞു ചേര്ന്ന നിന്റെ നഗ്നത എന്റേതല്ല 

ഇനി ഒന്നും ഓർക്കേണ്ടതില്ല 

യേശുവിന്റെ ചോര വാർന്ന  മുഖം  കയ്യിലെടുത്ത് 

മഗ്ദലന മറിയം നെഞ്ചോടു ചേർക്കുന്നു

 ചോരയോട് ചേർന്ന് അവളുടെ മുല പാലും ചുവക്കുന്നു 

യേശുവിന്റെ ചോര വീണു നനഞ്ഞ മണ്ണിൽ 

മറിയത്തിന്റെ മുലപ്പാൽ നനഞ്ഞ മണ്ണിൽ 

നിന്റെ വിയർപ്പു വീണു നനഞ്ഞ മണ്ണിൽ 

വേണ്ട എനിക്കിത്തിരി ഇടം