സ്മാർത്തവിചാരം

നിന്റെ അമ്മയാവാം 

നീ പറയുന്നതെല്ലാം ഒരു പക്ഷെ  ശരിയുമാവാം  

പക്ഷെ ഒന്ന് നിഷേധിക്കാനാവില്ല 

നിന്റെ അച്ഛന് വഴങ്ങിയതാണ്  അവർ 

അത് കൊണ്ട് ബലാൽസംഗം ചെയ്യപ്പെട്ടു എന്ന് 

പരാതിപെടാൻ അവർക്ക് എന്ത് അർഹത ?

എന്റെ പിഴ എന്റെ വലിയ പിഴ 

മനസ്താപത്തോടെ കിടന്നുറങ്ങി 

കാറ്റെടുത്തു പോയ ഒരു മഴപ്പാട്ട്

കാറ്റെടുത്തു പോയ ഒരു മഴപ്പാട്ട്  ..
ഉള്ളിൽ ഒളിച്ചു വച്ചത്
നീ മാത്രം ഒരു കണ്‍കോണിൽ
കണ്ടെടുത്ത്
അറിയാതെ പറഞ്ഞ കഥയിൽ
സ്വയം തോന്നിയത്
നടന്ന വഴിയിൽ
വീണ്ടും നടക്കുമ്പോൾ
കൂടെയില്ലെങ്കിലും
വെറുതെ
വിശേഷം പറയും ..
അല്ലെങ്കിലും വല്യ കാര്യങ്ങൾ ഒന്നുമല്ലല്ലോ
പറഞ്ഞു വരുന്നത്

നിന്നെ കാത്തു നിന്നത്
രാത്രി ചന്ദ്രൻ ബാക്കിയാക്കിയ നിലാവ്
വെളുത്ത പൂക്കളായത് ..
പ്രണയ സ്വപ്നങ്ങൾ ചുവന്നു വിരിഞ്ഞത്

ഇപ്പോൾ ഇവിടെ പെയ്ത മഴ
മരുഭൂമിയിൽ വെളുത്ത് പെയ്യുന്നതായി
നീ മഴയുടെ കുളിരിൽ അലിഞ്ഞു നിൽക്കുനതായി
ആ മഴ ഞാനാവുന്നതായി ..

ഒക്കെ വെറുതെ
ഇവിടെ നനഞ്ഞു പെയ്യുന്ന
കണ്ണീരിന്റെ മൂടുപടത്തിനപ്പുറം
മഴ മാത്രം പെയ്യും ..
കാറ്റടിക്കുമ്പോൾ ചെരിഞ്ഞും ആടിയും
സ്വപ്നങ്ങൾക്കൊപ്പം പെയ്തൊഴിയും

പൂവുകൾ വീണ്ടും വിരിയുമ്പോൾ
ആരാണ് ബാക്കിയാവുക ?

വിലാപം

വിലാപം 

ഒരുകാൽ പാതി മടക്കി ഉയർത്തി 

നീ ഗർവോടെ ആഞ്ഞു ചവിട്ടി ഒന്ന് മുരണ്ടു 

ചുവന്ന കണ്ണിൽ ആജ്ഞ

ഒരു മുറിവിന്റെ പത്തി  ചൂടി 

എന്റെ ചുമലിൽ ആടിയിരുന്നു 

ശിരസ്സിൽ വിലാസ്സവതിയായി ദേവി 

ചുവന്ന പട്ടിൽ തിളങ്ങി 

വെഞ്ചാമരം ,മുത്തുകുട, ആലവട്ടം 

ഉയര്ന്നു നില്ക്കാൻ അലങ്കാരങ്ങൾ 

പിന്കാലിൽ ചൂഴ്ന്നു പഴുത്ത 

പോട് 

ഇരുകാൽ ചുറ്റിയ ചങ്ങല 

ചുറ്റും ശബ്ദഭേരി 

സ്ഫോടനങ്ങൾ 

തിങ്ങി നിറയും ആരാധകവൃന്ദം 

ഫ്ലെക്സ് ചിത്രങ്ങൾ ചരിത്രം പദവികൾ ...പുല്ല് 

 

തലയുയർത്തി കരയാൻ 

ഇല്ല ..കണ്ണുനീർ ബാക്കിയില്ല 

ഉളളിൽ ഒരു പച്ച കാടിന്റെ ചിത്രം 

ചിതലരിക്കുന്നു ..

രക്ഷിക്കാൻ  ആരുടെ ചുമലിലാണ് 

എന്റെ ദൈവം വരുന്നത്