വിലാപം

വിലാപം 

ഒരുകാൽ പാതി മടക്കി ഉയർത്തി 

നീ ഗർവോടെ ആഞ്ഞു ചവിട്ടി ഒന്ന് മുരണ്ടു 

ചുവന്ന കണ്ണിൽ ആജ്ഞ

ഒരു മുറിവിന്റെ പത്തി  ചൂടി 

എന്റെ ചുമലിൽ ആടിയിരുന്നു 

ശിരസ്സിൽ വിലാസ്സവതിയായി ദേവി 

ചുവന്ന പട്ടിൽ തിളങ്ങി 

വെഞ്ചാമരം ,മുത്തുകുട, ആലവട്ടം 

ഉയര്ന്നു നില്ക്കാൻ അലങ്കാരങ്ങൾ 

പിന്കാലിൽ ചൂഴ്ന്നു പഴുത്ത 

പോട് 

ഇരുകാൽ ചുറ്റിയ ചങ്ങല 

ചുറ്റും ശബ്ദഭേരി 

സ്ഫോടനങ്ങൾ 

തിങ്ങി നിറയും ആരാധകവൃന്ദം 

ഫ്ലെക്സ് ചിത്രങ്ങൾ ചരിത്രം പദവികൾ ...പുല്ല് 

 

തലയുയർത്തി കരയാൻ 

ഇല്ല ..കണ്ണുനീർ ബാക്കിയില്ല 

ഉളളിൽ ഒരു പച്ച കാടിന്റെ ചിത്രം 

ചിതലരിക്കുന്നു ..

രക്ഷിക്കാൻ  ആരുടെ ചുമലിലാണ് 

എന്റെ ദൈവം വരുന്നത് 

രണ്ടാം പാഠം

രണ്ടാം പാഠത്തിൽ 

വിരിയാൻ വച്ച മയിൽ പീലി 

നീ ചോദിച്ചപ്പോൾ 

മടിക്കാതെ തന്നത് 

എന്റെ ഉള്ളിൽ ആ ചോദ്യം 

ഒരു മയിൽ നൃത്തം ചെയ്തു 

കൊഴിഞ്ഞ പീലികൾ 

താഴെ വീണു വിരിഞ്ഞു 

വേദനയുടെ പീലികൾ 

നിന്റെ പുതിയ അതിഥി 

എന്റെ ചുണ്ടിൽ ചോര വീഴ്ത്തി ചിരിച്ചു 

നീയും 

ചോര വീണത്

പരിഹാസ ചിരിയുടെ കിലുക്കത്തിൽ 

കരഞ്ഞു വീർത്ത മുഖം നെഞ്ചിൽ ചേർത്ത് 

ഉള്ളിലേക്ക് നിന്റെ വേദനകളുടെ മുള്ളുകൾ 

ആഴ്ത്തി മുറിക്കാൻ 

നീ വീഴാതെ നടക്കൂ 

മയിൽപീലികൾ വിടരുന്നു 

ഇവിടെ മഴമേഘം നിഴൽ വീഴ്ത്തുന്നു 

ഇടം 

ഈ മണ്ണ് ഈ ഭൂമി 

ഈ മഴയും ഈ പുഴയും 

ഈ വേനലും ഈ വെയിലും 

എന്റേതല്ല 

ചകിരിനാരിൽ കോർത്ത്‌ നീ നൽകിയ കുരിശും എന്റേതല്ല 

ഓർമയുണ്ട് 

മുലപാലിന്റെ മാധുര്യത്തിനൊപ്പം 

ചെന്നിനായകത്തിന്റെ കയ്പ്പ് നൽകിയ അമ്മയെ 

ഇടതു മാറിലെ നിന്റെ കറുത്ത മറുക് എനിക്കുള്ളതല്ല 

ഓർമയുണ്ട്

അനുവാദം ചോദിക്കാതെ പടി കയറിയെത്തിയ 

കടം കേറി ആരോടും അനുവാദം വാങ്ങാതെ 

ഒരു മുഴം കയറുമായി പടിയിറങ്ങിയ അച്ഛനെ 

നിന്റെ മേൽ ചുണ്ടിൽ പൊടിഞ്ഞ വിയർപ്പ് എന്റേതല്ല 

പാതി മറഞ്ഞ ബോധത്തിന് മേൽ ഇരുളിന്റെ നാവു പിഴിഞ്ഞ് നിറച്ച 

ലഹരിയുടെ രാത്രികൾ 

കണികൊന്നയുടെ ഇളം മഞ്ഞ അലിഞ്ഞു ചേര്ന്ന നിന്റെ നഗ്നത എന്റേതല്ല 

ഇനി ഒന്നും ഓർക്കേണ്ടതില്ല 

യേശുവിന്റെ ചോര വാർന്ന  മുഖം  കയ്യിലെടുത്ത് 

മഗ്ദലന മറിയം നെഞ്ചോടു ചേർക്കുന്നു

 ചോരയോട് ചേർന്ന് അവളുടെ മുല പാലും ചുവക്കുന്നു 

യേശുവിന്റെ ചോര വീണു നനഞ്ഞ മണ്ണിൽ 

മറിയത്തിന്റെ മുലപ്പാൽ നനഞ്ഞ മണ്ണിൽ 

നിന്റെ വിയർപ്പു വീണു നനഞ്ഞ മണ്ണിൽ 

വേണ്ട എനിക്കിത്തിരി ഇടം